Contrat de Mariage de Michel Fernet & Olive DeLaVoye
(G. Rageot N.R. le 23 mai 1684, no 2766)

cliquez ici pour voir copie de l'acte




Pardevant Gilles Rageot Notaire gardenotte du Roy Nostre Sire

en la Prévoste de Québecq en la Nouvelle France furent Présents

en leurs personnes Pierre De Lavoye habitant de la coste Des Anges

stipulant pour Olive DeLaVoye sa fille et de déffuncte Jacquette

Grignon ses père et mère du diocèse de cette ville Lad. Fille

ce présente et de son consentement d'une part. Et Michel Fernet et de

Chistine Juneau ses père et mère demeurant et habitants de la terre

et Seigneurie de Neufville de la parroisse de St François de Salles

esvesché de cette dite ville pour luy et en son nom d'autre part. Les-

quelles partyes de leur bon grez et vollonté en la présence et du

consentement de leurs parens et amys pour ce assemblez de part et

d'autre sçavoir de la part desd. De LaVoye, De Pierre Girard et Pierre

Grenon beaux frères de lad. Ollive De La Voye, du Sieur François Ha-

zeur marchand Bourgeois de cette ville et de Anne Soumande son es-

pouse. De Marie Prou et de Marie Anne Hazeur sur du dit Sr. Hazeur

leurs amys. Et de la part dud. Michel Fernet du Sr. Pierre Nolan Bour-

geois de cette ville, de Srs Anthoine de Serre, Jean Dubust et Pierre

Jallet ses amys. Ont reconnu et confessé avoir fait et accordé en-

semble de bonne foy le traitté de Mariage et conventions suivantes

C'est asçavoir que led. Pierre DeLaVoye a promis et promet de bailler

et donner lad. Ollive De La Voye sa fille de son dit consentement par

nom et loy de mariage au dit Michel Fernet qui a promis et promet de la

prendre pour sa femme et légitime espouse comme aussy lad. Ollive

De La Voye le promet prendre pour son mary et légitime espoux. Ycel-

luy mariage faire et solemniser en face de nostre Mere Saincte

Esglise Catholique Apostolique et Romaine le plustost que faire ce

pourra et quil sera advisé et deslibérer entreux leurs dits parens

et amys sy Dieu et Nostre dite Mère Saincte Esglise y consentent et

accordent, pour estre lesd. Futurs espoux uns et communs en tous biens

meubles, acquets et conquests immeubles du jour de leurs espousailles

Led. Futur espoux prenant lad. Future espouse avec tous ses droits, nom,

raisons et actions quelle a de présent et qui luy pourront advenir

tant par succession donnation quautrement. Ne seront tenus aux deb-

tes lun de lautre faictes et crées avant la solemnité de leur maria-

ge ains sy (aucunes y a seront) payer et acquitter par celluy de qui

elle procederont et sur son bien, sera douée lad. Future espouse du

douaire coustumier ou de la somme de Trois cents livres de douaire

prefix a son choix et pour une fois payé, et en faveur dud. Futur ma-

riage led. Futur espoux du consentement dud. Pierre de La Voye père

de lad. Future en cas quil ny ait enfans vivant procréés dud. Futur

mariage se sont fait et font respectivement lun a lautre donnation

mutuelle et reciproque de tous leurs biens meubles acquest et con-

quests immeuibles mesme de leur propres qui leur pourront competer et

apparteneir au jour det trespas du premier mourant, pour en jouir faire

et disposer par le survivant comme de son bien propre et loyal ac-

quest. Et pour faire insinuer ses presentes partout ou il appratien-

dra dans quatre moys d'huy suivant lordonnance lesd. Futurs espoux

ont faict et constituer leur procureur le porteur des presentes au-

quel ils donnent pouvoir de ce faire et d'en requerir acte, Car ain-

sy &ca Promettant &ca, Obligeant respectivement &ca, Renonceant &ca,

Faict et passé aud. Quebec estude dud. Notaire avant midy le vingt

troisiesme de may mil six cent quatre vingt quatre es presence de

Sr Robert Mossion Me. Tailleur d'habits et Guillaume Barrué demeurant

aud. Quebecq tesmoins qui ont avec lesd. Pierre De La Voye, Sieur et

dame Hazeur, Prou, Nolan, Anne Soumande, Marie Anne Hazeur, De Serre,

Jeanne Pellerin et Notarie signé Et Lesd. Futurs espoux, Girard, Grenon

Dubust et Jallet declaré ne sçavoir escrire ne signé de ce Interpellé

suivant Lordonnance.

p. de lavois

A Serre

F Hazeur

Marie Proust

Anne Soumande

Mossion

p. nolan

Jeanne Pellerin

Marie anne hazeur

Barruet

Rageot Not. Royal